Daan a susik ti makitkita a rason no apay a napangtaan ti maysa a mannalon ti padana a mannalon idiay Barangay Langlangca 1st, Candon City, Ilocos Sur.
Ti biktima ket agtawen iti limapulo ket tallo, mannalon, residente iti nadakamat a barangay.
Ti met suspek ket agtawen iti limapulo ket tallo, residente ti Barangay Casilagan Norte, ili ti Banayoyo.
Iti pannakiuman ti Bombo Radyo Vigan ken ni PLT Jovelyn Antalan ti Candon City Police Station, saan laeng a daytoy a gundaway a nagriri dagiti dua a mannalon gapu ta adda pay dagiti kallabes a saan da a panagkinnawatan maipapan iti patangan ti panagaramat ti irigasion.
Segun ken ni Antalan, mapapati nga adda dagiti gundaway nga usaren lattan ti biktima ti irigasion uray addan dagiti naka-schedule sabali.
Maipalagip a mannarimaan nga agmulmula ti biktima ti bukel ti tabako idi immasideg ti suspek ket kellaat na a pinangtaan na daytoy a patayen.
Naammuan a mapapati a nakainom ti arak ti suspek idi mapasamak ti insidente.
