
Rumrummuar a love triangle ti mapapati a rason ti pannakapaltog ti maysa nga online seller babaen iti ti dati a live-in partner ti nobiana idiay Barangay Pong-ol, Vigan City, Ilocos Sur.
Iti pannaki-uman ti Bombo Radyo Vigan ken ni PLT. Amado Somera, saan a maawat ti suspek ti panagsinada iti dati a live-in partner-na ta kunana a nadadael ti 16 a tawen a panagdennada.
Malaksid dayta, inatap idi ti suspek nga adda sabali a lalaki ti dati a live-in partner-na ngem pinaglibakan met daytoy ti dati a kaayan-ayatna.
Maipalagip nga agin-inanan ti biktima ken ti nobiana iti uneg ti kuarto idin ta pwinersa ti suspek a lukatan daytoy nga isu ti gundaway a pinaltuganna ti biktima iti namin-ano a daras babaen iti caliber 357.
Nagsagaba ti tama ti paltog iti takyag ken ulona a puon ti nakatayanna.
Kabayatanna, boluntaryo a simmuko ti suspek ken maisagsaganan ti kaso a maipila kontra kenkuana.
Saan a naalan dagiti pannakabagi ti linteg ti naaramat a paltog ta kinuna ti suspek a natinnagna daytoy.
Kabayatanna, pinasingkedan met ni alyas Weng, nobia ti biktima nga idi naiputok ti suspek ti paltog ket nakiginginnubal pay daytoy kenkuana tapno maigawid ti dakkes a panggepna.
Ngem nupay kasta, inwalin daytoy ti suspek isu a nagundawayanna latta a paltogan ti biktima.
Segun ken ni alyas Weng, nasayaat met ti panagsinada ken napagnumuanda pay nga aggayyemda latta gapu ta adda dagiti anakda ngem kunana a nagbaliw ti galad ti suspek ket sabsabali ti pigsa wenno turedna idi napasamak ti pammaltog.










