Saan nga ang-angaw ti ar-aramiden a panagsagana ti gobierno para iti manamnama nga epekto ti super El Niño iti pagilian.
Dayta ti pinasingkedan ti Malakanyang kasaruno ti reaksion dagiti netizen ken dagiti dadduma a grupo iti panangibaga ni Presidente Ferdinand Marcos Jr. a gumatang iti timba tapno pangtaya iti danum ti tudo a mabalin nga aramaten ita a panawen ti tikag.
Segun ken ni Palace Press Officer Atty. Claire Castro, nasken a seryoswen dagiti pakdaar dagiti ahensia a nakabantay iti agbalin nga epekto ti super El Niño a mabalin a kumaro kadagiti sumaruno a bulan isu a kunana a saan nga agbalin nga utek-timba.
Innayon ni Castro a maysa ti timba kadagiti dinakamat ni DSWD Secretary Rex Gatchalian iti taripnong a naangay, ken no kasano a maaddaan iti filtration ti danum a maisuro kadagiti umili isu a mairuarto ti video tapno masurwan ti publiko.
