VIGAN CITY- Nakemmeg ti suspek ti pananglimlimo idiay San Ildefonso ken dadduma pay nga ili ti probinsiya a ni Roger Claor Velasco a taga-La Paz, Abra ket adun dagiti nagparang a nabiktima na a nakasagana nga agidarum.
Segun ken ni Police Chief Inspector Rodel Ularte, hepe ti San Ildefonso municipal police station, modus ti suspek iti mangidiaya ti semento ti nalaka a gatad ket nu maala na iti kwartan ket aglalaok ton ti irason na tapnu makapanaw ken saan ton nga agsubli.
Pinatalgedan ni Ularte a nabayagen nga ar-aramiden ti suspek iti pananglimlimo ta nakasuan pay idiay Galimuyod, malaksid laeng iti kaso na idiay Abra a panagrames.
Segun ti maysa kadagiti biktima a ni Kapitan Fidel Algos ti Bayubay Sur, San Vicente, nairana nga adda proyekto ti barangay da idi isu a ti ammo na ket ni Velasco ti para deliver kadagiti semento ket idimmawat kenkuana ti suspek ti tallo ribo a pisos ta igatang na ti kanen na ta saan pay a nangaldaw ket idi inikkan ti biktima, pimmanawen ken saanen a nagsubli.
Kabayatanna, ti met Department of Public Works and Highways ti inpambar ti suspek idi linimlimo na ni Barangay Captain Beatriz Malapit idiay Bungro, Magsingal isu a naala kenkuana ti pito ribo lima gasut a pisos.
Segun ken ni Malapit, inayaban isuna ti suspek idiay barangay hall ta kapatang na ti engineer ti DPWH para iti pannakasimpa ti kalsada da agingga a dimmawat ti kwarta ti suspek nga inbaga na nga igatang na ti lutuen na a makan ken paglutuan da ket idi naala na ti kwarta, saanen a nagpakita pay ken ti biktima.
maysa kadagiti kabaranggayan ti kapitana ti nakalasin ti suspek ta naipost ti ladawan na iti social media kas manglimlimo ngem naladawen ta nakalibasen ti suspek.
