VIGAN CITY- Nakemmeg ti maysa a construction worker nga agtawen iti uppat a pulo, a taga-Brgy Olo-olo Sur, Santiago gapu iti panagikut na iti illegal a droga.
Iti pannaki-uman ti Bombo Radyo Vigan kenni Police Major Macario Dulawan, ti Sta.Maria Municipal Police Station, dimmawat ti police assistance ti Barangay official ti Poblacion Sur, Sta. Maria gapu ti domestic violence a pakairamanan ti suspek ken ti agrekreklamo a biktima a live-in partner na.
Segun ken ni Police Major Dulawan, imbutaktak ti biktima nga agus-usar ti suspek iti droga ken mapapati nga adda ikotna a paltog nga isu ti ar-aramantenna a pammutbuteng kadakuada.
Kalpasan ti sumagmamano a minutos, simmangpet ti suspek a nakalugan iti motorsiklona ket kinapatang dagiti opisial ti barangay iti bangir a kuarto ti barangay hall.
Idi makasangpet dagiti PNP Personnel, kinapatangda met ti suspek mainaig ti initial complain a domestic violence, ngem kalpasan ti apagbiit a panagsaritada, impudno ti suspek nga adda ikut na a shabu.
Linuktan ti suspek ti sling bag na, ket dita nga inpakitana ti maysa a piraso a small-heat-sealed transparent sachet a naglaon iti mapapati a shabu nga agdagsen ti 0.3 grams nga aggatad ti Php2,040 manipud iti pitakana.
Nakumpiskar pay manipud ti suspek ti maysa a puraw nga A4 coupon bond a naglaon iti powdered substance a mapapati a shabu residue; maysa a kutsilyo nga agrukod iti 210 mm wenno 8 inches; ken maysa a nga improvised pointed object nga agrukod ti 90mm wenno 3 inches.
Kabayatanna, kinuna ni Police Major Dulawan datin a drug surrenderre ti suspek ken naka-categorize kas Street Level Individual.
