VICTIM- Vanessa Bugarin 
SUSPECT – Lord Jim Bilen 
VICTIM – Rowena Bugarin
VIGAN CITY – Maragsakan ni dati a Sto. Domingo municipal police station Eduardo Medrano a naiyetnagen ti dusa kontra ken ni Lord Jim Bilen, ti suspek a nangbagkong kadagiti agkasinsin a da Rowena kenni Vanessa Bugarin idi December 5, 2015 idiay Sitio Bagumbayan, Paras, Sto. Domingo.
Guilty ti dua a bilang iti kaso a murder ni Bilen ket tungpal biyag a pannakaibalud iti dusa na ti tunggal kaso a sangsangwen na isu a maiyalis to isunan idiay New Bilibid Prison tapnu ikaro na iti basol na.
Ni Rowena idi ket 2nd year Hotel and Restaurant Management student ti Ilocos Sur Community College idinto a ni Vanessa ket 2nd year BSBA student ti University of Northern Philippines.
Mainaig dayta, maragsakan met ti ina ni Vanessa a ni Luz Bugarin iti pannakaiyetnag iti dusa ti suspek gapu ta naipaayanen iti hustisya iti pannakatay dagiti agkasinsin a nagsagaba ti sangapulo ket lima ken sangapulo ket walo a dunor iti panangbagkong kadakuada ti suspek a poon iti nakatayan da.
Maipalagip nga idi rabii ti December 5, 2015, binagkong ti suspek dagiti agkasinsin a matmaturog idi iti pagtaengan da Rowena ket natuntun nu siasino ti akin-aramid babaen iti tugot ti dara a naggapu iti uneg ti nagturugan dagiti biktima agingga iti pagtaengan ti suspek ken ti nabati na a singsing iti nakapasamakan iti krimen, malaksid laeng kadagiti karamot iti bagi na.
