Agtultuloy ti monitoring ken information dissemination nga ar-aramiden ti Sta. Catalina Municipal Disaster Risk Reduction and Management Council gapu kadagiti nagsasaruno a gingined a nangdayyeg iti kabaybayan ti nasao nga ili.
Iti pannaki-uman ti Bombo Radyo Vigan ken ni Janette Rabara, Municipal Government Department Head, awan pay laeng dagiti agindeg a kayatna ti agparelocate ta adayo met ti episentro ti gingined isu a saan unay a narikna.
Ngem gapu ta ti ili ti Sta. Catalina ket narisgo ti gapu iti lokasyonna nga asideg iti geological feature, ikagkagumaanda nga aramiden ti amin nangruna ti pannakaisagana dagiti evacuation area a kumamangan dagiti agindeg no bilang kumaro pay dagiti marikna a gingined.
Dagiti mangngalap ket awan pay met ti naibilin kadakuada a maiparit ti mapan iti taaw ngem masapulda latta ti agridam.
Palagip met ti opisial kadagiti umili a liklikan ti agiwaras iti peke a damag maipanggep iti kastoy a didigra tapno saan a mangitunda iti panagbuteng iti sabali a tao.
Maipalagip a sipud pay Disyembre 17 a nairekord ti nagsasaruno a panaggined iti nasao a kabaybayan gapu iti panaggaraw iti Manila Trench.
