Nangisayangkat ti aerial inspection ken site visit iti Northern Sierra Madre Natural Park idiay Isabela province ni House Speaker Faustino Bojie Dy III kaduana dagiti sumagmamano a kongresista a miembro ti House Committee on Government Enterprises and Privatization nga idadauluan ni Parañaque Rep. Eric Olivarez.
Ti addang ket maipanggep iti maidurduron a pannakaipasa ti House Bill No. 3538 wenno gakat a panangaramid ti Sierra Madre Conservation and Development Authority (SMCDA).
Dayta ket maysa nga specialized government body a mangtutok iti long-term protection, rehabilitation ken sustainable development iti Sierra Madre region a mangsaksakup iti sangapulo a probinsia pakairamanan iti Cagayan, Isabela, Aurora, Nueva Vizcaya, Quirino, Nueva Ecija, Rizal, Bulacan, Laguna ken Quezon.
Segun ken ni Speaker Dy, ti panagpreserba idiay Sierra Madre ket saan laeng a paset iti environmental protection no diketdi panagsagana pay kontra iti didigra.
Impalagip ni Dy a namin-anon a daras a nakatulong ti Sierra Madre a nangpakapsot dagiti napipigsa a bagyo a simrek iti Philippine Area of Responsibility (PAR) isu a saan unay a nakaru iti impaayna a damage iti komunidad.
