Natakuatan ti animal rescue group a Luna ken Furry Siblings dagiti bag a naglaon kadagiti natay nga aso iti uneg ti septic tank sadiay Barangay Minuyan IV, San Jose del Monte City, Bulacan.
Daytoy ti mangnayon iti dua a napalabas nga insidente ti pannakaibelleng dagiti bangkay ti ayup iti siudad, pakairamanan ti pannakaduktal idi Oktubre 25 a bangkay ti aso ken pusa iti Barangay Minuyan Proper, a nainaig iti kontrobersia iti maysa a pet crematorium sadiay Bacoor, Cavite.
Segun kenni Jennifer Soro, paraveterinary worker ti City Veterinary Office, pito agingga walo a sako ti agruprupsa a bangkay ti ayup ti nasarakan iti septic tank idi Nobiembre 2025, idinto a nakasarakda pay kadagiti natay nga aso a naikabil iti sako idiay Barangay Minuyan V idi Mayo 19, 2026.
Segun ken ni Soro, nadlawda nga agpapada dagiti sako, identification label ken numero a naikabil kadagiti bangkay ti animal, ngem saan pay a pinasingkedan dagiti otoridad no agkakanaig wenno nagtaud ti isu met laeng a gubuayan dagiti insidente.
