VIGAN CITY – Saan nga anamongan iti grupo da Bayan Muna Rep. Carlos Isagani Zarate ti inaprubaran ni Presidente Rodrigo Duterte a sin tax wennu nayon a buwis para kadagiti lako nga arak ken sigarilyo ta patienna a ti nasao a linteg ket mangparigat laeng kadagiti napanglaw a Pilipino.
Ti pannaki-uman ti Bombo Radyo Vigan ken ni Zarate, no kayatda a mailiklik dagiti umili manipud iti bisyo kas iti panaginom ti arak ken panagsigarilyo, masapul nga adda iti linteg a maaramid a mangiparit iti panaginom ti arak ken panagsigarilyo imbes a buwisanda iti nakangat-ngato dagiti nasao a produkto.
Innayon na nga uray nu buwisan iti gobiyerno dagiti lako nga arak ken sigarilyo ket mangbiruk latta dagiti mangnginom ken managsigarilyo iti wagas tapnu makapagbisyo ta uray no nangina dagiti nasao a produkto ket gumatang danto latta.
Ingunamgunam ti kongresista a no man pay mainayon para iti pondo ti Universal Health Care Law dagiti buwis a maur-orda ket adu dagiti banag a pangalaanda iti pondo a saan a mairaman a marigatan dagiti napanglaw nga umili agsipud ta patien na a nu makolekta koma dagiti adu a buwis manipud kadagiti ahensia ti gobierno ket mabalinda nga aramaten a pangpatakder kadagiti health facility ditoy pagilian.
