Pinasingkedan ni House Justice Committee chairperson ken Batangas Rep. Gerville Luistro a kasla inaklon ti kampo ni Vice Presidente Sara Duterte a maiyuli iti Senado ti impeachment complaint kontra kenkuana.
Segun ken ni Luistro, ti statement ti defense team nga idiay da laengen Senate trial a sumungbat ket indikasion a namnamaen dan a maipasa ti committee ti findings ti probable cause.
Impaganetget ti agpampanday linteg a nababa laeng ti basaran para iti probable cause, masapul laeng ti naan-anay a basaran tapno maituloy ti kaso, saan a pammaneknek ti nagbasolan.
Target ti House Committee on Justice a leppasen ti panagdenggeg inton Abril 29 ket manamnama nga agbotos ti komite no adda naan-anay a basaran tapno maiyuli ti impeachment iti Senado.
