Pinasingkedan ni House lead prosecutor ken Batangas Rep. Gerville Luistro a saan a masayang dagiti ebidensia kadagiti naibabawi nga articles of impeachment kontra ken ni Vice President Sara Duterte.
Daytoy ket gapu ta maited dagituy iti Office of the Ombudsman para iti posible a panangipila dagiti kaso a criminal.
Imbabawi ti prosecution panel dagiti tallo manipud iti uppat nga articles of impeachment ken nabati ti Article II wenno iti maipagarup a saan a naideklarar a baknang ti bise presidente.
Innayon ni Luistro a maragsakan da iti plano ni Ombudsman Jesus Crispin Remulla a sukisoken dagiti ebidensia a naipasango iti impeachment trial, partikular dagiti rekord nga adda pakainaiganna iti maipagarup a madi a panagaramat ti confidential funds ken panagpasuksok.
