VIGAN CITY – Napukawan iti P80,000 a gatad ti kuarta iti E-wallet account ti maysa a senior citizen a negosyante iti Vigan City Public Market idiay Barangay 8, Vigan City, Ilocos Sur
Ti biktima ket agtawen iti pitopulo ket dua nga agnaed iti nasao a lugar idinto a saan a nabigbig ti suspek.
Personal a nagturong ti biktima iti Vigan City Police Station ket impakaammona nga adda iti saanna nga am-ammo a nangaramat ti GCash account-na a gimmatang iti agduduma a gamit iti online kangrunaan idiay Lazada.
Sakbay ti pannakaduktal ti biktima ket maysa a lalaki iti napan iti store na ti nagpaload iti P300 ket balligi ti transaksyonda, idin kiniddawna a picture-n ti transaction details isu nga impalubos ti biktima a picture-n ti ladawan ti screenshot ti cellphone-na ket kalpasanna pimmanawen ti lalaki.
Sumagmamano laeng a minutos ket nakigtot ti biktima ta idi ireview-na ti transaction history iti GCash-na ket napansinna a naikkatan ti P80,000 ken naicrediten iti maysa nga online shopping app.
Naawatna pay ti SMS a nangipakaammo a ti Gcash account na ket nai-link iti online app.
Kinuna ti biktima a saanna nga impalubos iti aniaman a transakyon a maibingay ti personal GCash information n akas ti OTP, MPIN wenno account credentials iti siasinoman ngem nalagipna ti lalaki a nangpicture ti screen ti cellphone-na a nagpakitaan ti OTP na.
Manarimaan iti imbestigasyon dagiti otoridad tapno maduktalan ti kinatao ti suspek.
