Impasigurado ni Senador Grace Poe, chairperson ti Senate Committee on Finance, a ninayonanda ti AKSYON fund ti Department of Migrant Workers (DMW) iti version ti Senado ti 2025 Budget Bill.
Ti pondo ket para iti panangipaay iti legal, medical, ken financial assistance kadagiti overseas Filipino workers (OFWs).
Segun pay ti senador, siguraduenda nga adda umdas a pondo para iti National Reintegration Center ken OFW helpdesks.
Adda met naisina a pondo manipud iti DSWD para iti panagsubli dagiti awan dokumentona nga OFW para iti counseling ken livelihood training.
Inyunay-unay ni Poe nga awan ti nasken nga agub-ubra a Filipino iti ballasiw-taaw nga agbalin a biktima ti death penalty.
Dinayaw na pay ti panagtitinnulong dagiti gobierno ti Pilipinas ken Indonesia tapno maisubli ni Mary Jane Veloso ditoy pagilian.
Mamati ni Poe a rumbeng a maipateg ken masalakniban ti pagsayaatan dagiti OFW ken masigurado ti karbenganda.
