Inallukoy ni Senator Francis Kiko Pangilinan ti National Food Authority (NFA) ken local government units nga insigida a gumatang ti irik ken dadduma pay nga agtaud a direkta kadagiti mannalon a Pilipino iti patas a presyo.
Immapela ni Pangilinan kalpasan kadagiti report a ti irik ket magatang laengen ita iti P13 kada kilo iti agduduma a lugar iti baet a P14-15 iti gastos iti produksyon.
Segun ken ni Pangilinan, saan a husto, saan a makatao ken saan a maikalintegan ti nasao nga addang.
Kinunana a rumbeng a gumatangen a direkta ti NFA kadagiti rice farmers tapno maliklikan a mapukawanda.
Kabayatanna, rumbeng nga i-activate dagiti LGU ti RA 11321 wenno Sagip Saka Law a mangpalubos kadakuada nga aggatang a direkta manipod kadagiti mannalon ken mangngalap nga awan ti public bidding-na.
Inlawlawagna a ti Sagip Saka Law ket mabalin a maaramat a paggatang iti taraon para iti school feeding programs, food packs, relief goods, ken dadduma pay a government supply a kasapulan bayat a sigsiguradoen a dagiti mannalon ket makasapul.
