Agsubli a dagus iti panagsanay ti 3-peat champion iti Palarong Pambansa ti badminton player a ni Carlitos Joe Corrales, tubo iti Narvacan, Ilocos Sur kalpasan ti pannakagun-odna manen iti gold medal iti nasao nga sporting event ita a tawen idiay Agusan del Sur.
Iti pannaki-uman ti Bombo Radyo Vigan ken ni Corrales, ti panagsublina nga agsanay ket tapno saganaan dagiti sumaruno a sumalianna nga international tournament ita met laeng a tawen.
Kunana a ti pannakagun-odna manen iti gold medal ita a maudi a tawen ti panagay-ayamna ket bunga iti napasnek a panagsanayna.
Naragsak ita ti rikna ni Corrales gapu ta natungpalna ti arapaapna a makagun-od iti gold medal ita a tawen ti Palarong Pambansa ket inkarina iti bagina a lalaingenna pay tapno makagiddan kadagiti international tournament.
Pinagyamanan met ti atleta dagiti nangsuporta kenkuana nangruna ti pamilia, coach ken team-na.
Proud met ti ina ti atleta a ni Charmaine Joy Corrales iti balligi ti anakna.
Segun ken ni Corrales, makitana ti anakna nga adda panagbutengna iti Dios ken napasnek nga agsanay.
Nupay kasta, mensahena met para iti anakna nga agbalin latta a napakumbaba iti ania man a gundaway ken addada latta a mangsuporta kenkuana.
Kabayatanna, naragsak met ti coach ni Corrales a ni Cyrill Gloria nangruna ta history ti naaramid ti atleta.
Segun ken ni Gloria, saanda a namnamaen nga umabot iti kastoy ni Corrales ngem nupay kasta ket makitada ti kinapasnekna nga agsanay.
Kanayon met ti panangisurona iti disiplina, panangaywan iti bagi tapno maitedda ti siento porsiento a laingda iti kompetision.
