2 a motorsiklo ti naigagara a nauram idiay Barangay Quinarayan, Narvacan, Ilocos Sur.
Dagiti motorsiklo ket kukua dagiti 2 a babai nga agpada a taga-Quinarayan idinto a ti suspek ket lalaki nga agtawen iti tallopulo ket dua, agnaed iti nasao met laeng a lugar.
Imparking dagiti biktima dagiti motorsikloda iti asideg ti pagtaenganda iti alas dyes y media idi Mayo 30, 2026.
Iti alas dos iti parbangon ita nga aldaw, May 31, kinita ti maysa a biktima dagiti motorsikloda ket nadlawna nga agtaktakder ti suspek iti asideg dagiti lugan.
Gapu ta nakadlaw ti nasao a biktima, tinawaganna ti kabsatna a mangkuyog kenkuana tapno saludsodenda ti suspek no apay nga adda iti lugarda.
Idi nadanonda ti nakaiparkingan dagiti motorsiklo, naimatangan dagiti agkabsat ti suspek a nagusar iti lighter a nangsindi kadagiti motorsiklo.
Gapu dayta, nagpatulongda kadagiti karrubada ken pinadasda a depdepen ti apoy ngem nauramen dagiti lugan.
Nagreport dagiti biktima iti Narvacan Municipal Police Station ket nakemmegda ti suspek babaen iti hot pursuit operation.
