Sinitar ni Senate Impeachment Court Presiding Officer Francis Chiz Escudero ti abogado ni Vice President Sara Duterte gapu iti nagbalin a saritna maipanggep ti Bar examination rating iti bise presidente.
Napasamak dayta iti impeachment trial bayat ti cross-examination ti defense counsel a ni Atty. Mark Vinluan ken ni NBI Regional Atty. Jerremy Lotoc a tumaktakder a testigo iti House prosecution panel.
Dinakamat ni Vinluan ti maysa a nalaing nga abogado ni Vice President Duterte ken nakapasa iti Bar Exam iti umuna a gundaway nga adda walopulo a porsiento a marka.
Kinunana a nangat-ngato ti grado ti bise presidente ngem iti kaaddoan nga abogado nga adda iti impeachment court.
Insigida met a nag-object ti miembro ti House prosecution panel ni Atty. Amando Virgil Ligutan ken kinunana nga awan ti pakainaigan ti nasao a sarita iti isyu a masarsarita iti panagdenggeg.
Inanamungan met ni Escudero ken pinalagipanna ni Vinluan a liklikan dagiti sarita a mabalin a makainsulto iti dadduma pay nga abogado nga adda iti korte.
