VIGAN CITY – Panaglabsing iti Presidential Decree 1602 wenno Anti Illegal Gambling Act ti sangwen a kaso dagiti sangapulo ket maysa a nagsusugal idiay Brgy. III, Vigan City a nakemmeg babaen iti naiwayat nga operasyon.
Nabigbig dagiti suspek a da Reynaldo Tupasi Pataray, agtawen iti uppat a pulo ket uppat, construction worker; Michael Ramos Abad, agtawen iti duapulo ket uppat, empleyado ti Department of Education; Joel Ricolcol Figucion, agtawen iti uppat a pulo ket walo, negosyante; Ronalyn Tuzon Pataray, agtawen iti duapulo ket lima, kahera; Mary Jane Aurellano, agtawen iti tallopulo ket pito ken ni Liezel Arizabal Crisologo, agtawen iti uppat a pulo ket pito.
Malaksid kadakuada, nakemmeg pay ni Luisa Puzon Pataray, agtawen iti uppat a pulo ket siam; Angela Faypon Regua, agtawen iti tallopulo ket walo; Junar Tapuro Antiporda, agtawen iti uppat a pulo ket uppat, STL worker ken maysa a menor de edad nga agpapada nga agnaed iti nasao a lugar pakairamananen ni Rhona Reboltiado nga agnaed idiay San Julian Norte, Vigan City.
Naaktuan dagiti suspek nga agaayam iti Tong its, Posoy ken Lucky 9 manipud kadagiti tallo a nagsisina a lamisaan nga inaramtda.
Dagiti naala nga ebidensia ket dagiti tallo a set ti baraha, sangapulo a piraso iti tugaw ken pusta nga aggatad iti sangaribo tallo a gasut walopulo ket lima a pisos (PHP 1,385).
