VIGAN CITY – Manarimaanen ti panangiyurnos ti probinsia kadagiti relief packs nga umabot iti mapatta-patta a nasurok a dua a milyon a pisos para kadagiti naapektaran iti phreatic eruption ti Bulkang Taal idiay Batangas.
Ti pannaki-uman ti Bombo Radyo Vigan ken ni Gov. Ryan Singson, inton sumaruno a lawas ket manamnama nga agbiahenton dagiti kameng ti Provincial Disaster Risk Reduction and Management Council a mangitulod kadagiti relief packs nga insagana ti probinsia para kadagiti nadidigra ti nasao a bulkan a kas tulong kadakuada.
Ingunamgunam ni Singson a no adda man ti umay agkamang a bakwit ditoy probinsia ket sisasagana ti probinsiya a mangawat kadakuada.
Nagyaman iti gobernador kadagiti amin a timmulong mangipakita iti kina-manang-ngaasi dagiti Ilocano iti sabali a tao.
Malaksid kadagiti relief packs, nakasagana pay ti probinsiya ken PDRRMO a tumulong iti rescue operations nu kaspangarigan kiddawen ti Batangas iti tulong ti sabali a probinsiya.
