
Inakurasan ti sumagmamano a ralihista dagiti a nagkedked iti dagus a medikal nga atension kadagiti nasurok 300 a demonstrador a naaresto sadiay Muntinlupa kagiddan ti panangrugi ti maika-49 nga Association of Southeast Asian Nations (ASEAN) Summit.
Imbingay ti Kabataan Party-list ti salaysay ni Jullian Vizcarra, estudiante iti Polytechnic University of the Philippines, a nangibaga a napukaw ti puot ti dadduma kadagiti naaresto, nakaro ti pannakadangran ken heat stroke.
Segun ken ni Vizcarra, karaman kadagiti mapapati a napagkedkedan ti medikal nga atension ket dagiti nataengan, indigenous minors ken maysa a masikog a mapapati a nadanog iti tyann, a nagresulta iti panagpadara.
Nakipaset dagiti ralihista iti protest action kontra iti Pax Silica initiative ken iti panagbisita ni United States President Donald Trump iti Pilipinas, idinto a naituding a maangay ti sabali pay a protesta sadiay Liwasang Bonifacio, Manila.










