Inrusat dagiti estudyante, mannursuro ken staff ti signature campaign iti Bantayog ng mga Bayani sadiay Quezon City tapno kontraen ti gannuat ti Pax Silica nga idauluan ti United States babaen ti Schools and Colleges Resist the Aggression and Plunder of Pax Silica (SCRAP Pax Silica).
Segun kenni lead initiator Michael Pante, nasurok a 500 college deans, faculty regents ken union presidents ti nagpirma iti protest statement, pakairamanan ti 11 a dean ken direktor manipud iti University of the Philippines (UP) Diliman, kasta met dagiti pannakabagi ti Ateneo de Manila University, Philippine Normal University ken grupo dagiti mannursuro.
Inyunay-unay ni Dr. Ramon Guillermo a ti Pilipinas ket mabalin laeng nga agbalin nga alikamen iti teknolohikal a panagsusupiat ti Estados Unidos ken China, idinto a kuna ti mangidadaulo ti Alliance of Concerned Teachers (ACT) a ni Ruby Bernardo a masapul a masalakniban dagiti Aetas ken mannalon a maapektaran iti nasao a proyekto.
Kinondenar pay ti grupo ti naituding a pannakapapanaw dagiti Aeta Hanguey manipud iti daga ti kapuonanda sadiay Capas, Tarlac, a paset ti naiplano a 1,620-ektaria a tech hub, ken kuestionaranna ti kinakurang ti detalye ken kinalawag iti katulagan iti laksid ti pannakaibaga nga awan ti mapirmaan a katulagan iti 49th Association of Southeast Asian Nations (ASEAN) Summit.
