Makaawat ti P1,000 nga insentibo dagiti amin a public school teacher iti pagilian ita a World Teachers’ Day kas paset ti panangbigbig ti sakripisio ken dedikasion dagiti mangisursuro.
Segun ti Department of Education, iti salinong ti administration ni President Marcos Jr. ket mapainget ti suportar kadagiti mangisursuro babaen iti agduduma a benepisiyo.
Karaman dayta iti nangatngato a teaching ken medical allowance, Special Hardship Allowance para kadagiti adda iti nasulinek a lugar ken nayatiddog a career progression system.
Dagiti mangisursuro met iti private school ket umawat ti P6,000 a nayon a salary subsidy iti salinong ti Government Assistance to Students and Teachers in Private Education (GASTPE).
Karaman pay iti dadduma a reporma iti panagkissay ti school forms, pannakaaramid iti 60,000 a baro a teaching positions iti 2026 budget, panagirruar ti performance-based bunos, nayon a vacation service credits ken pannakairusat ti Teacher Education Roadmap 2025-2035 tapno isagana dagiti mangisursuro iti kabaroan a teknolohiya.
