Impasigurado ni Budget Secretary Amenah Pangandaman iti Senado a madaman a kitkitaen ita ti Department of Public Works and Highways dagiti proyekto nga inserrek ti ahensia iti salinong ti 2026 National Expenditure Program.
Iti maikadua nga aldaw a briefing ti Development Budget Corrdination Committee kadagiti senador ket kwinestyon ni Senador Erwin Tulfo ti agpada a badyet iti flood control idiay Antique ken Iloilo nga umabot iti P149.75 million ti gatadna.
Madanagan ni Sen. Erwin kadagiti maidandanon kenkuana a report iti NEP a mapadpadas a mairaman dagiti kwestyonable a proyekto tapno saan a mapagduduaan inton maidatag ti badyet iti bicameral conference committee.
Inlawlawag ni Pangandaman a DPWH ti naggapuan dagiti proyekto ket isuda laeng iti DBM ti mangitutuding iti gatad ti pakabuklan a pondo ti ahensia, nga inton sumaruno a tawen ket umabot iti P875 billion.
