Patien ni Pres. Ferdinand Marcos Jr. a natungpal ti Independent Commission on Infrastructure (ICI) ti mandatoda nga agimbestigar kadagiti makukwestyon a flood control projects iti pagilian.
Segun ken ni Marcos, komkompletoenen iti komisyon ti report-da kalpasan a napagtitipon dagiti naduktalanda.
Apaman a malpas ket maipasa ti report iti Department of Justice (DOJ) ken iti Office of the Ombudsman para ti posible a panagipila iti kaso no adda mapaneknekan nga iregularidad.
Saan met a direkta a pinasingkedan ti presidente no ikkatennan iti komisyon wenno sukatan dagiti bakante a puesto, ngem impaganetgetna nga adun iti nalpas a trabaho iti ICI ken naaramiddan iti akem a naited kadakuada.
Naidatag ti ICI idi September 2025 tapno iumbestigaran ti mapapati nga anomalia iti flood control projects.
Iti agdama ket idadauluan dayta ni ICI Chairperson Andres Reyes Jr. kalpasan a nagikkat dagiti dua a dati a commissioner.
