Personal nga impaay ni Pres. Ferdinand Marcos Jr. ti Certificate of Entitlement (COEs) iti sangagasut a pamilia manipod Barangay Ibabang Iyam iti opisyal a panagbisitana idiay Lucena City.
Lineppas ti nasao a panagiwaras ti nasurok dua a dekada a panaguray dagiti residente tapno legal a matagikua dagiti daga a nabayagen a pagnanaedanda.
Sakup dagiti benepisiaryo ti Presidential Proclamation No. 436 a napirmaan pay laeng idi 2003 para iti seguridad iti pagnanaedan dagiti umili.
Segun ti Department of Human Settlements and Urban Development, paset dayta iti napalawa nga Expanded 4PH Program para kadagiti pamilia nga agkasapulan iti bukod a daga.
Dagiti benepisyario ket nayon iti immunan a 185 a pamilia iti siudad a nakaawat iti isu met la a benepisyo iti salinong ti proklamasyon.
Indauluan pay ni Pres. Marcos ti panagiwaras iti saggaysa a sako iti bagas kadagiti nasurok 4,000 a residente manipod 33 a barangay a naisayangkat iti Lucena City Government Complex.
Siguradoen ti presidente a saan a maminsan laeng ti ayuda ta target ti gobierno a mangipaay iti sangapulo a kilo iti bagas kada bulan kadagiti kualipikado a pamilia.
