Nagpanawagan ni Senador Bam Aquino iti gobierno nga yatiddog ti tulong iti working ken middle class nga agtultuloy a marigrigatan iti presyo iti petrolyo ken dagiti magatang ngem agtaltalinaed a saan a karaman iti ayuda iti gobierno.
Impaganetget ni Aquino ti pagkasapulan a mayatiddoh ti tulong para iti working ken middle class a bukbuklen iti 80% a Pilipino iti baet iti krisis a sangsangwen iti pagilian.
Segun ken ni Aquino, napateg ti akem dagiti agtrabtraho kas natibker nga adigi iti ekonomia ngem isuda iti kangrunaan a marigatan iti nangina a presyo ti magatang ken petrolyo.
Kinunana a rumbeng a saan a mayaleng-aleng ti kasasaad ti working ken middle class ken rumbeng a maipangrunada.
Impaganetgetna manen ti gakat a suspensoen ti panagkolekta ti excise tax iti kruso ken gasolina ken ti panangkissay ti value-added tax (VAT) kadagiti produkto ken serbisyo manipod iti sangapulo ket dua a porsiento nga agbalin a sangapulo a porsiento.
