Nagtalinaed iti natalged a lugar idiay Malakanyang ni President Ferdinand Marcos Jr. idi September 21, 2025 bayat a maisaysayangkat ti kilos-protesta kontra iti korapsyon.
Segun ken ni Palace Press Officer ken PCO Undersecretary Atty. Claire Castro, aktibo ti presidente iti panagbantay iti sitwasyon ken imbalbalakadna kadagiti polis nga ipatungpal ti maximum tolerance.
Nagkedked ni Castro a nangsungbat nu siasino dagiti kadua ti presidente bayat iti panagbantayna iti kilos-protesta.
Kinuna ni Department of the Interior and Local Government (DILG) Secretary Jonvic Remulla, nakikammayet kenkuana ti presidente manipod iti alas onse iti bigat ken timmawag manen iti alas dos iti malem tapno agkiddaw iti personal a patta iti sitwasyon ken ti lebel ti pangta manipod kadagiti grupo dagiti nagprotesta.
Kabayatanna, agtaltalinaed iti kangatoan a lebel ti seguridad idiay Malakanyang ta isu ti sentro ti puersa iti gobierno, isu a saan a naibaba iti alert level.
