Impakaammo ti Malakanyang a mabalin a maibilang a “breach of trust” no adda impormasion ni Bise Presidente Sara Duterte mainaig iti posible a giyera idiay Middle East idi pay ngem saan a naipakaammo iti gobierno.
Daytoy ket kasaruno ti statement ni VP Sara a nabayagen a mangmangeg na ti posibilidad ti giyera iti rehiyon uray idi tawen 2022 pay laeng.
Segun ken ni Palace Press Officer USec. Claire Castro, no adda kastuy nga impormasion ti bise presidente ket masapul a maibaga a dagus iti Presidente ken dagiti maseknan nga ahensia tapno makapagsagana ti gobierno.
Innayon pay ti Malakanyang a ti saan a panangibingay ti napateg nga impormasion ti maysa opisial ti gobierno ket mabalin a maibilang a nonfeasance wenno pannakapaay nga aramiden ti responsibilidad na iti publiko.
