Pinaglibakan ti Department of Agriculture nga agang-angkat ti gobierno iti repolyo kas pinasingkedan ti Malakanyang.
Segun ken ni Palace Press Officer Atty. Claire Castro, nakasaritana mismo ni DA Secretary Francisco Tiu Laurel Jr. iti taripnong ti UPLIFT Committee a nakaibagaan iti nasao nga isyu.
Kinuna ni Castro, pinasingkedan ni Laurel nga awan ti kinaagpaysu ti ibagabaga ni Senator Imee Marcos ta saan nga agang-angkat ti Department of Agriculture iti repolyo.
Idi Lunes ket binabalaw ni Marcos iti mapapati a panagado dagiti imported a nateng pakairamanan ti repolyo a mapapati nga agresresulta iti panagbaba ti farmgate prices ken mapilpilitan laengen iti sumagmamano a mannalon a mangiballeng iti apitda.
Inallukoy ti senadora ti gobierno a gatangen ti apit dagiti lokal a mannalon.
