Inawagan a peke ti Malakanyang ti mapapati a police report nga agwarwaras iti social media a pannakairamnan ni First Lady Liza Araneta Marcos iti pannakatay ni negosyante a ni Paolo Tantoco.
Segun ken ni Palace Press Officer Claire Castro, ti paset ti police report nga adda nagan ti 1st lady ket nainayon lawing.
Kinunana a saan a karaman iti entourage ti first lady ni Paolo Tantoco, ken saan nga idiay Beverly Hilton Hotel a lugar a nakatayan ti negosyante iti napanan ti first lady.
Para ken ni Castro, nakababain iti ar-aramiden dagiti agpampammarang a journalist ta mairamraman iti politika dagiti pribado a tao nga agladladingit.
Pinasingkedanna a ti nasao nga isyu ket panangdadael laeng iti first lady, iti presidente ken administrasyon.
Nagpanawagan ti Malakanyang nga i-verify dagiti nagkalap iti impormasyon ken saan nga agiwaras ti fake news.
