Nag-smirk ken nagkusilap laengen ni Pres. Ferdinand Marcos Jr. iti alegasyon ni Senator Imee Marcos a kayat ti presidente a maaddaan ti no election wenno “no-el” scenario tapno mayatiddog iti terminona.
Sakbay iti panagturongna idiay Japan para iti maikapat nga aldaw nga state visit ket pinadas ti media a kiddawan ti reaksyon ti presidente maipanggep iti nasao nga isyu.
Impadoble laeng ti presidente ti saludsod ken limmiklik iti media idinto a ni First Lady Liza Araneta Marcos ket nagkatawa laengen iti reaksyon ti presidente.
Kabayatanna, ibilang met ti Malakanyang a diversionary tactic laeng ti alegasyon ni Sen. Imee tapno maiyakar iti atensyon iti impeachment trial ni Vice President Sara Duterte.
Segun ken ni Palace Press Officer Claire Castro, arigna kayat a maiyaw-awan ti isyu iti mapapati a panagtulong ni Sen. Robin Padilla ken ni Senador Ronald Bato dela Rosa ken iti napasamak a riribok idiay Senado.
Impaganetget ni Castro a sumursurot ti presidente iti linteg ken konstitusyon pakairamanan iti panangisayangkat ti election inton 2028.
