Nagpanawagan ti Malakanyang ti panagkaykaysa ti gobierno, media ken social media users kontra iti kumarkaro a fake news a mabalin a makadadael iti interes ti publiko ken uray ti soberanya ti pagilian.
Segun ken ni Presidential Communications Office (PCO) Undersecretary ken Palace Press Officer Claire Castro, masapul ti organisado a tignay dagiti ahensia ti gobierno, mainstream media ken dadduma pay tapno napaspas a maammuan ken makorek dagiti madi nga impormasion.
Impaganetget ni Castro a saan a kabaelan ti gobierno a maymaysa ti misinformation ken disinformation, isu a napateg ti dagus a panangammo ken panang-korek ti media dagiti impormasion nga awan ti kinapudno na.
Nagpanawagan pay iti mainstream media a dagus nga ipakaammo iti publiko no adda agwarwaras a madi a damag wenno impormasion.
