Binilin ti Philippine National Police dagiti commander ti territorial units a makibinnulig kadagiti maseknan nga ahensia ti gobierno mainaig iti panangipaay iti fuel subsidy para kadagiti drayber ken operator a naapektaran iti nangina a presio ti langis.
Uray no gagangay a babaen iti fuel subsidy card ti wagas a pannakaiwaras ti subsidy, adda gundaway a manu-mano a maited ti ayuda, nangruna kadagiti probinsia.
Gapu dayta, pinasingkedan ni PNP Chief General Melencio Nartatez Jr a napateg a maaddaan iti naurnos a koordinasion tapno maisagana amin ti kasapulan nga addang iti seguridad tapno masigurado a napardas, naurnos, ken naannayas ti pannakaipaay ti tulong pinansial.
Immunan nga inwaragawag ti Department of Transportation ti pannakaipaay ti fuel subsidy nga aggatad iti P5,000 mangrugi iti umay a lawas.
Ti umuna a paset ti panagiwaras ket maaramid idiay Metro Manila, sarunwen dagiti probinsia.
Segun iti DOTr, makitinnulongda iti dadduma pay nga ahensia ti gobierno kas ti Department of Social Welfare and Development, Department of the Interior and Local Government ken dagiti local government unit para iti panagiwarasan.
