Mangipila iti reklamo a sedition ken inciting to sedition ti Philippine National Police – Criminal Investigation and Detection Group (PNP-CIDG) kontra ken ni Atty. Israelito Torreon, legal counsel ni Apollo Quiboloy ken dagiti sangapulo ket dua a dadduma pay.
Daytoy ket gapu ti tinignay nga inaramid dagiti kameng ti Kingdom of Jesus Christ idi Agosto idi linapdanda dagiti polis a mangkemmeg iti pastor.
Karaman kadagiti inreklamo ti PNP-CIDG nga idauluan ni Brig. Gen. Nicolas Torre, dagiti dadduma pay a lider ken kameng ti Kingdom of Jesus Crist (KOJC) ket da Eleanor Cardona, Carlo Catiil, Jeffrey Celis ken ti dati nga spokesperson ti NTF-ELCAC a ni Lorraine Badoy-Partosa.
Karaman iti nangibasaranda ti reklamo ti PNP-CIDG ti pannakaisayangkat ti kilos-protesta dagiti kameng ti KOJC a maikontra iti pammalubos ti lokal a gobierno a mangisayangkat laeng iti prayer rally iti uneg ti compound ti grupo, kasta pay ti pananglappedda dagiti lugan ken direct restraints, isu a nadunor ti dadduma nga opisial ti polisia.
