Nagballaag ti Philippine National Police (PNP) kadagiti police commander a napaay a nangresolba kadagiti kaso nga adda pakainaigan ti napalabas a 2025 midterm elections ta posible a maikkatda.
Segun ken ni PNP Public Information Office Chief PCol. Randulf Tuaño, kasaruno dayta ti bilin ni PNP Chief PGen. Rommel Francisco Marbil a mangipatungpal iti naing-inget a monitoring iti performance dagiti opisyal.
Maaddaan ti linawas a case conference iti amin a regional ken provincial directors kasta payen dagiti commander tapno ipakaammo ti kasasaad dagiti kaso nga adda pakainaigan ti eleksyon ken dadduma pay nga insidente iti kinaranggas.
Innayon ni Tuaño a nu awan ti nalawag a progreso ti kaso ket mabalin a maapektaran ti performance rating ti commander ken agresulta ti pannaka-ikkat tapno masukatan iti naep-epektibo a lider.
Maipalagip nga impakaammo ni Gen. Marbil a Back to Basics Program ti PNP ta gagemda a papigsaen ti disiplina, professionalism, ken napaspas a tignay dagiti polis.
