Pinapigsa ti Philippine Coast Guard (PCG) ti internal accountability da iti temporario nga aktibasion ti Probity Assurance Team (PAT) – Interim.
Segun ken ni PCG Spokesperson Commodore Noemie Cayabyab, gagem ti PAT a papigsaen ti integridad ken disiplina iti amin a lebel bayat a maipatungpal ti mandato kas kangrunaan a maritime law enforcement agency.
Mandato ti PAT nga agala ti ebidensia kadagiti nai-report a panaglabsing, agisayangkat ti legal a panagtiliw, mangipila ti kaso a kriminal ken administratibo, agirekomenda ti panagikkat ti kameng ti kas panangsurot ti PCG Code of Conduct ken tumulong iti panagsukisok ken panang-dusa kadagiti karaman iti kriminal nga aktibidad.
Ti PAT-Interim ket buklen dagiti opisial ken kameng manipud iti Coast Guard Chief of Staff, Coast Guard Intelligence Force, Coast Guard Inspector General and Internal Affairs Service, Deputy Chief of Coast Guard Staff for Intelligence CG-2, Coast Guard Legal Service, ken Coast Guard Investigation and Detection Management Service.
