Mangisayangkat manen iti kilos protesta ken noise barrage ti grupo a Piston ita nga aldaw, Abril 7 tapno ipaganetget ti panawaganda a maikkat ti excise tax kadagiti produkto petrolyo ken mailaklaka ti presio ti langis iti local market.
Segun ken ni PISTON National President Mody Floranda, maisayangkat daytoy iti nadumaduma a terminal ken tiendaan agraman dagiti tsuper ken conductor ti nadumaduma a public utility vehicle.
Kayat ti grupo nga ipadanon iti Marcos administration ti rigrigat ti transport sector gapu iti awan sarday a bigtime oil price hike a saan a kabaelan a lapdan ti gobierno.
Ipampanawagan manen ti grupo ti pannakawaswas ti Oil Deregulation Law nga isu ti agbalbalin a rason no apay a saan a makontrol ti gobierno ti panaggaraw ti presio dagiti produkto petrolyo.
