VIGAN CITY-Tinakaw ti mapapati a hacker ti P14 million a gatad ti diesel kalpasan a na-hack na ti fleet card ti maysa a kompania, segun ti National Bureau of Investigation.
Nakemmeg ti NBI ti suspek iti pagtaenganna idiay Pasig City kalpasan nga imbaga ti firm nga in-hack na ti e-mail da tapno makastrek iti fleet card.
Kalpasanna, inusar ti suspek ti fleet card a nangpunno iti maysa a truck iti dandani makabulan, nga umabot iti agarup P14.4 million a gatad iti diesel.
Malaksid dayta, nakumpiskar pay kenkuana dagiti drug paraphernalia, ken peke nga identification (ID) cards.
Sumangsango itan ti hacker iti kaso a computer-related fraud, falsification of public documents, kasta metti panagikut ken panagusar kadagiti drug paraphernalia kalpasan a nagpositibo iti panagusarna iti illegal a droga.
Kabayatanna, kinuna dagiti otoridad nga ituloyda ti panangisayangkat iti forensic examination iti computer ken gadgets a nakumpiskar iti suspek tapno maammuan no nabiktimana dagiti dadduma a kompania.
