Naibayogen iti magnitude 6.9 a ginggined manipud iti immuna a nairekord a magnitude 6.7 ti Philippine Institute of Volcanology and Seismology (PHIVOLCS) kalpasan a nadayyeg iti Cebu iti agarup alas nuebe sigkwenta y nueba ti rabii idi kalman, Setyembre 30.
Segun iti ahensia, adda kauneg ti ginggined a lima kilometro ken ti nagsentro iti siudad ti Bogo.
Narikna ti intensity 5 idiay siudad ti Sipapalay, Cebu; Negros Occidental; siudad ti Lapu-Lapu; ken siudad ti Tacloban, idinto a narikna met ti intensity 4 idiay San Fernando, Cebu; Bulan, Bulusan, Casiguran, Sorsogon; siudad ti Roxas, Capiz; siudad ti Himamaylan, Negros Occidental; Ubay, Bohol; Lawaan, Eastern Samar; Laoang, Northern Samar; Catbalogan, Samar; ken siudad ti Dipolog, Zamboanga del Norte.
Narikna met ti intensity 3 idiay siudad ti Legazpi, Albay; siudad ti Iriga, Camarines Sur; Donsol, Sorsogon; ken Tibiao, Antique.
Nagballaag ti ahensia a mangipaay pay ti sumagmamano nga aftershocks kadagiti nasao a lugar.
Kabayatanna, nangiruar metten ti Tsunami Warning Alert ti PHIVOLCS gapu ta nariknada ti minor sea-level disturbance.
Manamnama ti napigsa a koriente ken napardas a panagbaliw ti lebel ti danum ti kabaybayan isu a nabalakadan iti publiko a saan payu laeng a mapan, kasta met kadagiti mangngalap a liklikanda pay laeng iti agturong iti nasao a lugar. – Augie Arellano
