Nairekord ti Philippine Institute of Volcanology and Seismology (PHIVOLCS) ti agsasaruno a pyroclastic density currents (PDCs) iti Bulkang Mayon idi kalman agingga ita kangrunaan iti Mi-isi Gully iti southwestern slopes.
Kagiddan dayta ket impakaammo ti Office of Civil Defense (OCD) nga umaboten iti 52 a barangay idiay Albay iti apektado iti ashfall manipod iti agtultuloy nga aktibidad iti bulkan.
Segun ken ni PHIVOLCS Director Dr. Teresito Bacolcol, nangrugi iti serye ti aktibidad iti alas kuatro baente otso iti malem idi May 2 idi naaddaan ti lava effusion iti summit a nagresulta iti collapse ken nag-generate iti kadakkelan a PDCs manipod naipangato ti Alert Level 3 iti Mayon.
Mapatta-patta nga umabot iti 4 kilometer iti kaatiddog nga inruar ti uson a gappuanan ti napuskol a dapo kadagiti ili tri Camalig, Guinobatan, Daraga ken Legazpi City.
Iti uneg iti 24 nga oras, nairekord ti duapulo ket lima a volcanic tremors, 284 rockfall events, ken 14 PDC signals idinto nga umabot iti 1,586 a tonelada kada aldaw ti Sulfur Dioxide flux.
