Nagtalinaed ti Mayon Volcano iti Alert Level 3 kalpasan ti innem a minuto a kalkalainganna ti panagbettakna idi Biernes, segun iti Philippine Institute of Volcanology and Seismology (PHIVOLCS).
Nairekord ti ahensia ti 15 a ginggined ti bulkan ken 30 a pasamak ti panagtinnag ti bato iti napalabas a 24 nga oras, bayat a dimmanon iti kangato ti dapo ken gas manipud iti abut ti bulkan iti 100 agingga iti 3,000 a metro.
Dimmanon iti 988 a tonelada iti kada aldaw ti sulfur dioxide-na, ket nasilawan met ti abut ken nagtultuloy a nagbalbaliw ti sukog ti bulkan.
Nainget pay laeng a maiparit ti iseserrek iti uneg ti innem a kilometro a Permanent Danger Zone ken panagtayab iti aniaman nga eroplano iti asideg ti bulkan gapu iti posible a panagreggaay ti daga, panagayus ti lava, panagbettak ken lahars.
