Nangipila ni House Senior Deputy Minority Leader ken Mamamayang Liberal party-list Rep. Leila de Lima ti resolusyon tapno imbestigaran ti Kamara dagiti abot iti pannakaipatungpal ti benepisyo ti Philhealth para kadagiti persons with disabilities (PWD).
Iti House Resolution 1113, kinuna ni de Lima a rumbeng a kitaen no masursurot ti automatic enrollment iti PWD iti National Health Insurance Program (NHIP), panagkolekta ti PhilHealth premium contributions ken accessibility iti health benefit packages iti salinong ti Magna Carta for Persons with Disability wenno Republic Act 11228.
Segun ken ni de Lima, adda pay ti isyu maipanggep ti panagbalin nga umdas ken mayannatup kadagiti PhilHealth benefit packages para kadagiti PWD, kangrunaan ti rehabilitation services, assistive devices, long-term care ken dadduma pay a disability-specific health interventions.
Kinunana pay a masapul a kitaen no epektibo ti inter-agency coordination iti nagbaetan ti PhilHealth, Department of Health (DOH), Department of Social Welfare and Development (DSWD), National Council on Disability Affairs (NCDA), ken dagiti lokal a gobierno tapno masigurado maipatulod ti health services ken financial protection para kadagiti PWD.
