VIGAN CITY – Impasigurado ni Armed Forces of the Philippines Chief of Staff General Romeo Brawner Jr a pagbayadenda ti Chinese Coast Guard (CCG) iti inaramidda a panangtakaw dagiti paltog ken panangdadaelda kadagiti gamit dagiti suldado a pilipino numanpay saanen nga indetalye ni Brawner ti sistema ti wagas a panagbayad ti CCG.
Kinuna ni Brawner a masapol nga agsungbat ti CCG kadagiti inaramidda a kinaranggas ken panangdadael kadagiti rubber boat.
Naamoan a pito a paltog a carbine Ar19 ti tinakaw ti Chinese Coast Guard ken dinadaelda dagiti equipment ken makina dagiti rubber boat babaen ti panangabotda kadagitoy.
Inawagan pay ni Brawner a pirata dagiti Chinese coast guard gapo iti nagbalin a tignayda.
Nupay kasta, saan pay a sigurado nu sumurot to ti China kadagiti otoridad ti Pilipinas aglalo ta immunan nga inbaga ti Beijing nga immuna a nangdungpar ti Philippine Navy isua bimmalesda laeng .
