Imbingay ni Sen. Risa Hontiveros nga agtaltalinaed a natibker dagiti residente iti Pag-asa Island iti baet iti pananglapped dagiti barko iti China iti panagkalapda iti ancestral fishing grounds.
Aktibo nga agtigtignay ti lokal a gobierno ken dagiti mangngalap tapno ilaban iti pagbiaganda bayat nga agtultuloy a maidurduron ti serbisyo iti salun-at ken edukasyonda iti isla.
Segun ken ni Hontiveros, marikna dagiti umili ti balligi iti Pilipinas ti arbitral award idi 2016 ken ipasada kadagiti agtutubo kas paset iti awareness-da.
Mainaig dayta ket maidurduron iti Senado ti West Philippine Sea Mandatory Education Bill tapno paunegen ti ammo dagiti Pilipino iti kinapateg ti panangsalaknib iti karbengan iti pagilian iti kabaybayan.
Innayon ti senadora a nanayunan ti P8.6 billion ti pondo ti Philippine Coast Guard ita 2026 tapno mapapigsa ti operasyon iti West Philippine Sea pakairamanan iti panaggatang dagiti baro a barko.
