VIGAN CITY – Manarimaan pay laeng iti panag-imbestigar dagiti pannakabagi ti linteg inaig iti napasamak a pammaltog idiay Barangay San Julian, Vigan City a nakatayan ti maysa a lalaki.
Iti pannaki-uman ti Bombo Radyo Vigan ken ni PLt. Col. David Dulnuan nga OIC iti Vigan City Police Station, kitkitaenda pay laeng dagiti CCTV footage a posible a makatulong iti imbestigasyonda iti pannakatay ni Jayson Ugay, agtawen ti tallopulo, naasawaan nga agnaed idiay Brgy. Paing, Bantay.
Segun ken ni Dulnuan, ti tama ti biktima ket ti akin kannigid a barukongna manipod iti likodna.
Innayonna pay a pinasingkedan ti pamiliana awan iti nakaririna ngem maibasar iti naalada nga impormasyon manipod iti Bantay Municipal Police Station ket adda iti blotter record a nakairaramananna.
Kabayatanna, saan pay laeng a maipalawag ti pamilia ti biktima nu apay a nakadanon iti nasao a lugar ni Ugay ta adda laeng iti timmawag sakbay iti ipapanawna iti pagtaenganda ngem saanna nga impakammo iti papananna.
