Naisayangkat ti ceremonial destructions dagiti nakumpiskar a firecrackers iti probinsia bayat ti panangrambak iti Baro a Tawen.
Iti pannakiuman ti Bombo Radyo Vigan ken ni PLTCOL. Rogelio Remiendo Jr, Public Information Officer ti Ilocos Sur Police Provincial Office (ISPPO), 1,892 ti confiscated ken surrendered boga kabayatan a 572 a palpalibang ti balligi a nadadael.
Impakaammo ni Remiendo a bimmaba ti bilang dagiti firecracker related injuries ita a tawen gapu ti relentless service dagiti pannakabagi ti linteg.
Agtultuloy latta ti panagkumpiskarda kadagiti ilegal a palpalibang uray nalpasen ti selebrasion para ti kinatalged ken seguridad dagiti umili.
Kabayatanna, nagyaman ni PLt. Col. Honesto Lazo Jr. a Deputy Provincial Director for Administration iti ISPPO kadagiti amin a timmulong para ti naannayas ken nakappia a panangsarabo iti baro a tawen iti probinsia ta ti kappia, linak ken talged ket nagun-od babaen ti panagtitinnulong iti kapulisan, partner agencies, stakeholders, Local Government Units ken dagiti umili.
