Nasurok 32, 000 a baro a teaching positions ti inaprubaran ti Department of Budget and Management (DBM) para iti School Year 2026–2027, segun iti Department of Education (DepEd).
Naragsak nga inawat ni DepEd Secretary Sonny Angara ti nadakamat nga addang ket impaganetget na a makatulong daytoy tapno marisut ti kasapulan iti classroom ken mapalag-an ti workload dagiti mangisursuro kadagiti pampubliko a pagadalan.
Segun ken ni Angara, madutokan dagiti baro a posision iti agduduma a lebel ti edukasion pakairamanan ti kindergarten, elementary, junior high school, senior high school, ken Alternative Learning System (ALS).
Pinasingkedan pay ti DepEd nga agtultuloy ti panangipatungpal ti Expanded Career Progression (ECP) system a mangted ti nalawag a career ladder para kadagiti mangisursuro ken school leaders.
