Saan nga umanamong ni Senior Deputy Minority Leader ken Caloocan 2nd District representative Edgar Erice ti singasing dagiti sumagmamano nga opisial nga ilongalong manen ti Charter Change wenno “ChaCha”, kasaruno ti decision ti Korte Suprema mainaig ti proseso ti impeachment.
Segun ken ni Erice, nalawag ken saan a narigat nga awaten ti nagbalin a pinal a decision ti Korte Suprema mainaig iti husto a constitutional procedures ti impeachment.
Gapu daytoy, imbilang ti opisial nga awan ti naan-anay a basaran ti gakat a ChaCha a maiyarig iti nadakamat a decision.
Dinakamat ni Erice a ti singasing ni Senate President Tito Sotto nga ilongalong ti Charter Change gapu iti decision ti Korte Suprema ket nakakatkatawa.
Innayon na pay nga awanen ti naan-anay a panawen tapno agisayangkat ti Constitutional Convention sakbay ti 2028 national elections.
