Nakisinnarak da Pres. Ferdinand Marcos Jr. ken First Lady Liza Araneta-Marcos iti Filipino Community idiay New Delhi, India idi rabii kas paset ti panagrugi ti state visit ti presidente.
Segun ken ni Pres. Marcos, manamnama a maluktan ti baro a koordinasyon ti Pilipinas ken India babaen ti panagpirma ti Strategic Partnership.
Kinuna ti presidente nga adu ti oportunidad idiay India a maibilang a maikapat a kadakkelan nga ekonomia iti lubong isu a targetna a makaallukoy iti ad-adu nga agpuonan tapno makaaramid iti ad-adu a trabaho.
Nakaituding pay a pirmaan ti Social Security Agreement iti nagbaetan ti Pilipinas ken India para iti nayon a salaknib dagiti Pilipino nga adda iti nasao a pagilian.
Impaganetget ti presidente a tunggal panagbisitana iti agduduma a pagilian ket nakatutok iti panangpasayaat iti biag dagiti Pilipino.
